ankara escort porno izle ankara escort ankara escort ankara escort ankara escort ankara escort ankara escort
Home » Wong Ka Keung 黃家強

愛延續 黃家強

Written By: TOASTIES MONSTER on 一月 6, 2014 No Comment

黃家強的新歌名叫〈有愛〉,是寫給非洲孤兒的,開宗明義宣揚愛與和平,在延續着他哥哥黃家駒精神的同時,也在提醒香港的大人細路們,要懂得知足。

「香港真係有好多小學雞,佢哋都反映晒啲大人(家長)係乜嘢人。」

畢竟,四十九歲的他現在已是兩子之父,從前的憤世嫉俗,今天也不經意地轉化作慈悲為懷了。「其實我都唔知點解突然間會有咁大改變,可能真係個責任心重咗好多。做咗爸爸,我成日都有個好強烈嘅感覺:我唔死得o架!我死咗,咁啲細路點算呀?所以我一定要照顧得佢哋好好!

「我成長嘅環境雖然唔係有錢,好多個兄弟姊妹住喺一個好細嘅蘇屋邨單位,但我爸爸媽媽好恩愛,我嘅童年好開心,令我都識得點去愛人,所以我都希望我嘅小朋友會係咁,畀到足夠嘅愛佢哋,佢哋先會成長得健康。

「我成日都有同大仔講阿哥(家駒)幾叻,我亦都有同佢講,要保護細佬,因為呢樣嘢係佢一生一世嘅責任,以後兩個係互相依靠,就好似我同我阿哥咁。」說罷,他展示了一個很溫柔的笑容。

有膊頭、有腰骨的男人,查實都應該要咁教小朋友。

咬爆mon

黃家強的大仔黃慶陽Keiyo,現年六歲,在英基國際學校就讀小學二年級。據家強形容,Keiyo是個很嗲、很o氹得人歡喜的小朋友,「佢成日都引到人哋嘢佢,我都唔知佢有乜嘢計,哈哈!」不過,他也是個膽小的孩子。

對我嚟講,我個大仔到o依家都仲係個BB。

佢由細到大,我同老婆都會灌輸佢見到啲uncle、auntie,一定要嗌人,同埋畀個hug佢哋,所以佢到o依家都好識做呢啲嘢。

佢喺屋企黐老婆多啲,成日都好鍾意寫啲紙仔,貼喺老婆衣帽間道門度,「Mami,I love you!」、「Mami,I miss you!」我就同老婆講:「你就好啦,佢貼咁多紙仔畀你!」跟住第二日我間房道門就會有一張,梗係老婆話畀佢聽o架啦!哈哈!但係佢會自動自覺貼畀老婆,我就要老婆提佢囉!

有時佢又會嗲老婆要同我哋瞓,老婆就會叫佢問我,我實話好o架,跟住咪逼到死死吓囉,佢又瞓到郁身郁勢,撐到我哋死咁滯!但如果佢要玩,打遊戲機呀、出去打波呀,佢就會識搵我。試過佢兩歲幾嗰陣,我畀部唔用嘅iPhone 3佢玩,佢打打吓機,發脾氣,肉緊得滯,一嘢就咬落個電話度,個mon就咁爆咗喎!癲o架!哈哈!我就同佢講:「以後唔畀你玩啦!你咁都得嘅?」我嗰陣其實係驚佢吞咗啲玻璃落肚多啲囉。

我呢個大仔好好笑,佢好鬼細膽,佢唔聽話,我話佢兩句,佢會即刻騰晒;同佢去打韆鞦,一擺佢上去,佢就大嗌:「放番我落嚟!放番我落嚟!」真係唔得o架佢!

自從上年佢有咗個細佬之後,佢仲會嗲我哋多啲,以前叫佢攬吓我,都未必一定肯,o依家見到細佬攬我哋呢,佢就會「爹哋、爹哋」咁走埋嚟纏住我,哈哈!

擒櫈仔

家強細仔黃曜陽,至今才一歲多,但很多方面卻明顯跟哥哥完全相反。「佢哥哥細個唔肯食奶,每次餵親都要半個鐘;但細佬就好為食,一支奶,五分鐘就飲完,我就索性叫佢自己揸住奶樽飲,佢又真係肯自己揸住嚟隊喎!哈哈!」除此之外,他更有驚人的膽識!

我個細仔,係追番嚟嘅,因為我同我老婆屋企兄弟姊妹多,都唔想個細路咁孤單,好似缺乏咗啲嘢咁,結果追咗五年先追到。我本來想追個女,因為我覺得最好係一仔一女,但結果又係仔,我即刻窒住咗唔敢再追,驚第三個都係仔,咁加埋我四個仔喺屋企,間屋真係會翻轉!

呢個細仔,真係唔識死o架!佢好細個嗰陣已經識擒BB牀,有次佢仲碌埋落地,嚇親自己,喊咗一陣就收聲,然後下次又再擒過,好tough!

到佢識行嗰陣,已經好鍾意擒上張餐枱度,擒唔到咩,會識自己去擔張櫈仔,推到個位啱啱好,再擒過!佢鍾意擒我哋又奈佢唔何,咪成日都捉番佢落嚟囉!其實我哋好鬼驚o架,望少佢一陣都唔得!touch wood佢都冇跌過落嚟,但佢會識搵櫈仔擒嗰吓討厭呀嘛!

佢一歲生日嗰陣,我家姐送咗部電動車仔畀佢玩,佢一坐上去,踩到個腳踏,架車「噓」一聲衝咗向前,佢都唔識死,仲要企埋喺上面哈哈哈!鬧佢呢,鬧兩鬧佢就會整個笑樣引你笑,等你唔好再鬧,好抵死!

佢o依家都開始識識哋同哥哥爭寵,有時會推開阿哥,有時又會八卦阿哥玩緊乜,過嚟搞搞震。不過我哋都有教哥哥要點樣錫細佬,只係有時阿哥玩得太癲,都會一腳伸埋去細佬度囉!
報細數

家強與日籍太太Makiko八年前相識於salon。那時她才廿六歲,於香港生活了一年多;而他則四十出頭,剛與黃貫中和葉世榮宣布了Beyond拆夥。

我老婆嘅老竇係醫生,佢爸爸媽媽都好後生,只係六十幾歲,仲未退休,佢屋企唔係好傳統,佢由細到大都喺英國讀書,啲性格好大情大性,似鬼妹仔多啲。

佢嗰陣喺英國讀完書返過日本,好唔鍾意,佢好討厭嗰啲好kawaii扮晒可愛嘅女仔,又好討厭啲男嘅好大男人。佢爸爸試過介紹啲醫生男仔畀佢識,佢同我講番:「佢哋寸到死!又大男人到死!睇見就憎呀,直情唔想同佢哋溝通呀!」哈哈!我話:「係呀!全世界淨係香港啲男仔先咁就得女仔o架咋!」哈哈哈!佢因為唔鍾意日本,所以嗰陣佢個香港同學叫佢嚟呢邊玩,佢覺得呢度好似英國,就決定喺度住,做繙譯。

八年前,佢初初識我嗰陣,都唔知我係藝人,我冇解釋。佢係咁問我啲朋友,我啲朋友同佢講,我係「artiste」,但係佢心目中嘅「artist」唔係藝人,係藝術家,所以佢一直都好奇怪我係乜嘢藝術家。

好好笑,我仲記得我初初識佢嗰陣,我仲報細自己十歲,哈哈!喂,佢嗰陣得廿六歲,咁細個,咁我梗係話自己廿九好啲啦,咁老實話畀佢知做乜啫大佬!哈哈!不過到真係拍咗拖幾個月之後,我都有同佢講番,佢都話我個樣呃到佢!哈哈!咁如果真係鍾意一個人嘅時候,年齡嘅嘢都冇乜所謂啦!又唔係乜嘢忘年戀。

其實我同佢最溝通到嗰樣嘢,係大家都鍾意音樂。我以前啲女朋友,或者識嘅女仔,全部基本上都唔知我聽乜嘢歌,但佢係唯一一個鍾意聽同我同一類歌嘅女仔,然後仲要做埋我老婆。有時有啲外國band嚟香港,佢甚至會買定飛叫我去睇o架。

回鍋肉

家有一位比自己年輕十四年的嬌妻,家強說自己很有福氣。但查實,他更有福氣的是,縱使太太和黃家本身的成長文化背景大不同,但婆媳之間卻相處得甚融洽。「有時我唔得閒返屋企食飯,我阿媽都會叫我老婆返去,咁我老婆就會帶兩個小朋友過去食飯,佢好識做,我屋企人都對佢好好。」至於在家,太太的日本文化則表現在烹飪上。

我老婆煮嘢OKo架咋,話好好味,我又唔覺囉,我煮嘢食好過佢囉!

佢啲煮飯方式好日本人,菜,永遠都唔會煮,永遠都係沙律,又或者變咗冷盤,好多時啲嘢食都係凍嘅,不過有時都會煮吓關東煮嗰啲囉。佢其中一樣嘢我覺得幾好食嘅,係啲海藻咁嘅嘢,黑色嘅,裏面有啲蘿蔔碎、蓮藕碎、豆腐泡咁,如果將呢啲嘢堆埋一堆堆好細堆放喺豉油碟度,就已經係懷石料理,只係我屋企嗰啲好大兜咁解啫,但你都咪話,食到尾真係飽到嘔o架!

至於煲湯呢,佢都只係識整日式嗰啲麵豉湯或者豆腐湯咁o架咋,但中國菜呢,佢都會入鄉隨俗,炒吓回鍋肉囉,好易咋嘛,買樽豆辦醬就搞掂,其實係佢自己鍾意食咋嘛,哈哈!我都有教佢整咕嚕肉,佢都整得OK嘅,但對比我嘅,我梗係叻啲啦!我啲朋友都讚我可以開私房菜喎,你諗吓我幾巴閉!呢啲真係天份嚟o架!哈哈!

愛連繫

黃家強有位日籍太太,很多人最好奇的是,到底家強和老婆是如何溝通的呢?是廣東話還是日語呢?

「其實我老婆英文好好,所以我同佢都係用英文溝通。嗰陣時為咗溝佢,咪勁惡補英文囉,身體語言乜鬼都做勻晒,唔得都講到得!」

他的自學英語課程包括:「睇電影唔睇字幕,同埋睇外國劇集都有用,啲對白口語化啲,仲易學,但我唔推介睇外國古裝片,講啲嘢同時裝片爭好遠!」

問題是,為何不索性學日語,或是叫太太學廣東話呢?「日文呢,我只係識啲單字:肚餓、食飯、好味嗰啲。如果我住喺日本,我或者會學日文,但o依家得我老婆同我練習,咁好難進步,學唔嚟;其實我老婆都有學過廣東話,但對佢嚟講太難,就算記得成句說話,佢都發唔正個音,人哋都唔知佢噏乜,咁就放棄咗,反正佢喺香港,個個同佢都用英文溝通到。」

所以,他和太太現在也是跟小朋友以英語溝通,「其實我o依家間中都會同佢哋講廣東話,太太都會同佢哋講日文,始終都係自己嘅mother tongue嘛。」

查實,一個家,有了愛,溝通語言已經是其次了。


自小得到哥哥家駒(左)愛護,家強(右)說,他也希望把這種愛延續給兩個小朋友。


○六年,跟拍拖才一年的Makiko結婚,於跑馬地馬會設宴。


家強說,有了孩子後,的確感覺到與太太的連繫性,才真正感覺到是一個家庭。


早前,家強到了非洲探訪當地孤兒,更為他們作了新歌〈有愛〉。


跟很多父親一樣,家強手機的圖片庫,大部分都是兩個兒子的照片或短片。


為了跟太太溝通,家強惡補英語,看電影劇集之外,更會看英文雜誌。

輯錄自 540期 Book B 【留星語】

VN:F [1.8.6_1065]
0
Rating: 0.0/10 (0 votes cast)
VN:F [1.8.6_1065]
Rating: 0 (from 0 votes)

Popularity: 3% [?]

Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Leave a Reply:

XHTML: You can use these tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

  Copyright © 2000-2016 香港只有一個二樓後座, All rights reserved.| Powered by BEYONDMUSIC| ZUGARCUBE by CAROLINE MAK