ankara escort porno izle ankara escort ankara escort ankara escort ankara escort ankara escort ankara escort
Home » Paul Wong 黃貫中

Paul點醒RB Band仔要瘀得

Written By: TOASTIES MONSTER on 十月 24, 2011 No Comment

80年代香港至強樂隊Beyond成員黃貫中(Paul),將訪問幾位心目中最欣賞的後輩歌手,率先登場的,正是同樣是Band仔出身的RubberBand(RB)。雖然兩代人出道時間相差近20年,成長路卻如有雷同,原來夾Band首要是「瘀」得。

P:黃貫中
6:6號@RubberBand
偉:阿偉@RubberBand
正:阿正@RubberBand

慘遭名校生落面

P:你哋係點入行架?

6:我哋唔似Beyond咁十幾歲未讀完書就夾Band入行,我哋係喺04年成立,之後簽咗金牌大風唱片公司,08年推出首張專輯《Apollo 18》。

偉:初時我哋冇諗過要入行做歌手,但意識到要簽唱片公司,先有機會繼續出唱片,我哋同其他新人一樣,都係派自己嘅demo碟畀每間大唱片公司自薦,希望畀人睇中。

P:Beyond當年都好似你哋一樣,記得推出第一張自資碟時,都係冇人理,窮到「燶」仲要蝕錢添。不過我哋得嗰十幾歲,根本唔知咩叫尊嚴,試過自己印飛派畀各大唱片公司,仲以為我哋請,人哋一定會嚟,點知一開騷,一個人都冇,真係好「尷」、好瘀、好後悔,唔派飛畀人仲型型地,點知個個睬你都傻,唯一一個有出現嘅人,就係Leslie Chan,之後我哋簽咗佢做第一位經理人。

6:我哋都試過撞門釘,有唱片公司高層直接同我哋講話唔得架啦,走啦,有啲就叫我哋重新再作過晒啲歌,有啲就話考慮吓,叫我哋返去等消息,最終梗係得個等字啦!直至遇到雷頌德(著名監製),先有機會簽唱片公司、出新碟。

P:我仲試過畀人玩添啦,仲係明落面嗰種喎。嗰次我去名校區派傳單,諗住讀得呢啲名校嘅,應該有啲Tastes會識欣賞我哋,點知我派緊傳單時,有個男仔離遠見到我,就仆住咁跑嚟我度,我咪嗱嗱聲遞張傳單畀佢囉,佢竟然立即將張傳單整皺,掟落地再轉頭走,當面畀人咁侮辱,我都呆咗。
向Beyond舊作偷師

P:你哋依家作緊咩歌呀?

6:依家聽番Beyond首《阿拉伯跳舞女郎》,因為我哋想喺新碟度加入土耳其元素。

P:我都堪稱好前衞,依家諗番起,嗰時我哋要趕第二場,但保母車有嘢做嚟唔到,我哋惟有着阿拉伯啲衫喺尖沙咀廣東道截的士,見到啲的士直頭係衝埋嚟,嘩!有五個油王喎,仲唔衝埋嚟咩?

6:咁咪好異相呢?

P:異相到爆,做幕前,去到某啲位都要豁出去,焗住啦,出得嚟撈就要咩啦。咁點解你哋又想做呢類型嘅歌呀?

6:我哋早前去土耳其做嘢同旅行嘛,買咗啲樂器,好想試吓,最初以為好創新,但靜落嚟就諗起Beyond首《阿拉伯跳舞女郎》都做咗,所以想向你偷師囉。

P:唔好講偷師,大家研究吓。其實呢類風格嘅歌都好啱你哋style,你哋唔係好硬嘅Rock Band,放呢種元素都好容易接受。

6:有啲人會覺得我哋呢條橋唔work,但我哋覺得,睇你肯唔肯試同點做啫,不過首歌依家都未開始寫,老闆梗係想講完,我哋即刻交貨,但我哋做嘢慢。我覺得大家係戴咗有色眼鏡睇呢件事,事實上,好多外國好勁嘅歌手都不停嘗試新嘢。
印度發掘靈感

P:呢啲咪叫做World Music囉,我相信麥當娜都聽好多呢類型音樂,之前我去印度,都叫的士司機車我去買當地十大最流行唱片,即係印度《勁歌金曲》之類嘅嘢。我聽過之後,覺得好正,仲買埋音樂教材走去研究,聽完之後有好大啟發,可以衝擊到自己嘅創作靈感,做音樂,千祈唔好千篇一律,只玩一模一樣。

6:阿Paul講得好,做音樂應該做自己鍾意嘅,可能唔知結果係點,但呢啲先係RubberBand嘅音樂。
初生之犢不畏虎

6:嘩,嗰個人係咪黐線架?

P:我好激氣架,大大聲聲同佢講:「你呢一世同你下一代,再下一代都一定要聽同唱我嘅歌!」我詛咒佢,要畀多啲正能量自己,唔係咁樣自我麻醉,真係好難再堅持落去。

6:我哋就冇你當年咁大膽,初生之犢不畏虎,年紀細係勇啲。

P:細個真係乜都夠膽死,又試過當街拉banner,就算明知畀人趕都照做,拉得5分鐘得5分鐘。

6:好在依家有互聯網,唔使咁「尷」要出面宣傳自己。
6號 Paul 寵物結緣

P:我同RubberBand未正式合作過,但我好欣賞你哋,聽過你哋嘅音樂,感覺好佻脫同活躍,接受能力比較強,你哋會走得比人遠。

6:其實我同阿Paul都算有淵源,05年未入行前,我喺電台做PA(助導),我曾經訪問過阿Paul隻狗。Paul,有冇印象呀?

P:我記得做過呢個節目,嗰位節目主持係我鄰居,佢又係養獒犬,所以做咗一個有關狗嘅訪問,其實泰山(阿Paul愛犬)先係主角,我只係負責拖隻狗去。不過,Sorry,我對你冇乜印象,我老喇,冇乜記性,只記得你哋好似唔係只得3位成員。

6:係呀,成員泥鯭出咗埠冇嚟。

偉:我哋全都有上過阿Paul嘅Band房,嗰次係綵排音樂會。

正:我記得你Band房有條bar,可以做引體上升,同埋地方好大。

P:我Band房好亂就真,其實香港好多Band都上過我度,以前做《勁歌金曲》,佢哋多數上嚟我度。

偉:我第一次見阿Paul時,仲未入行,我去蘭桂坊咁啱撞到你做騷,於是我喺樓下等你合照,張相擺咗喺屋企好耐,我係你fans,我鍾意你夠寸,最鍾意你藍色封面嗰隻叫《Yellow》嘅碟。

P:嗰隻係我第一次作個人發展嘅碟嚟架。


黃貫中從Band仔出身,如今已成為不少後輩的偶像。


RubberBand三位成員獲黃貫中鼓勵,要多作新嘗試。


香港殿堂級樂隊Beyond是空前,亦很大可能是絕後的搖滾神話。


黃貫中大談當年夾Band趣事。


RubberBand是近年香港較令人有印象的樂隊組合。


RubberBand沒有像Beyond四子般少年出道,少了很多輕狂的經歷。

攝影:劉智源 採訪:音樂組
場地:牛涮鍋@海港城LCX
髮型:Niki@Headquarters(黃貫中)
Mad Ho@IL Coloptst(RubberBand)
化妝:Jonathan@MOD Academy

VN:F [1.8.6_1065]
0
Rating: 0.0/10 (0 votes cast)
VN:F [1.8.6_1065]
Rating: 0 (from 0 votes)

Popularity: 9% [?]

Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Leave a Reply:

XHTML: You can use these tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

  Copyright © 2000-2016 香港只有一個二樓後座, All rights reserved.| Powered by BEYONDMUSIC| ZUGARCUBE by CAROLINE MAK